नेपाल कय पत्रकारिता कय जब जिकिर किहा जाई बाँके जिला कय नाम दुसर तिसर स्थान मईहाँ ई जरुर आवत हय । हिंया वि.सं. २०११ साल से पत्रकारिता कय निऊ डाला गवा रहय । वि.सं. २०११ साल मईहाँ स्व. महावीर प्रसाद गुप्ता कय साप्ताहिक नयाँ सन्देश पहिल पत्रिका निकला
रहय । मूला ई पत्रिका सरकारी मान्यता से नाय निकला रहय । प्रज्ञा परिषद कय आर्थिक सहयोग मईहाँ भारत कय उत्तर प्रदेश कय राजधानी लखनऊ जऊन कि नेपालगंज से १९० किलोमिटर दुरी पर हय, हुँवा से ई पत्रिका छपी कय आवत रहय । ई पत्रिका १ वरस तक निकला बाद मईहाँ पईसा कय कभी कय कारण बन्द हुई गवा । इके बाद मईहाँ २०१२ साल मईहाँ बब्रुबाहन सिंह अऊर अनिरुद प्रसाद सिंह कय सम्पादन मईहाँ मंगल ज्योति नाम कय पत्रिका मुखपत्र मंगलप्रसाद माध्यमिक विद्यालय निकालिस । ई पत्रिका कय १ अंक सिरिफ प्रकाशित भवा । ईके ठिक ५ साल बाद २०१६ साल मईहाँ प० स्व. योगेश्वर प्रसाद मिश्र ‘वैद्य’ जी हिन्दी भाषा मईहाँ मातृभूमि साप्ताहिक निकालिन, उप्पर जिकिर किहाँ गवा नयाँ सन्देश, मंगल ज्योति जईस पत्रिका सरकारी स्तर मईहाँ दर्ता नाय भवा रहय । पर ई मातृभूमि साप्ताहिक पत्रिका अईसन पत्रिका होय जो कि तत्कालीन बडा हाकिम कय लिखित इजाजत मईहाँ कुछ वरस तक छपा । बाँके बर्दिया गोश्वारा कय बडा हाकिम कय कार्यालय ई पत्रिका कईहाँ निकालेक खातिर पहाडी कागज मईहाँ हाथ से लिखि कय स्वीकृति दिहिस रहय । ऊ समय मईहाँ नेपालगंज मईहाँ कउनौ प्रिन्टि· प्रेस नाय लाग रहय । ई मारे रुपैडिहा भारत से छापै कय स्वीकृति कागत मईहाँ लिख दिहा गवा रहय । बाद मईहाँ २०१८ साल मा ई नेपालगंज मईहाँ पहिल प्रेस पाटन प्रिन्टि· प्रेस कय स्थापना भवा । इके बाद मईहाँ फिर प. योगेश्वर प्रसाद मिश्रा ‘वैद्य’ जी गोसाई गाँव मईहाँ मातृभूमि नाम कय छापाखाना लगाए कय मातृभूमि पत्रिका निकालय लागे । ई पत्रिका नेपालगंज अउर रुपैडिहा तक पढ्य खातिर भेजा जात रहय ।
२०१८ साल मईहाँ शिक्षा अउर साहित्य क्षेत्र मईहाँ सऊख रखय वाले मोहनलाल श्रेष्ठ ‘प्रभाकर’, स्व. वि. विकास, इन्द्रमणि मानव अउर जगत बहादुर सिंह जईसन व्यक्तितिन कय प्रयास मईहाँ ‘नौलो पाईला’ मासिक पत्रिका प्रकाशित भवा । पर यहु पत्रिका आर्थिक समस्या कय खातिर कुछै समय मईहाँ बन्द हुई गवा ।
बाद मईहाँ ई ठऊवा से अग्रज साहित्यकार इन्द्रमणि मानव कय सम्पादन÷प्रकाशन अऊर स्व. वि. विकास कय सह–सम्पादन मईहाँ २०१९ साल पुष १ गते दिन राष्ट्रिय आव्हान साप्ताहिक छपय लगा । ई पत्रिका कय नाम कय पाछे २०२१ अगहन १ से (पंचायती व्यवस्था प्रबुद्ध प्रहरी) जईस शब्द रक्खा गवा । ई विच्चय मईहाँ मोहनलाल श्रेष्ठ, जगत बहादुर सिंह, कृष्ण विक्रम शाह जईसे लोग भी सम्पादक मण्डल मईहाँ रक्खे गए । कुछय अंक छपय कय बाद पइसा के कमी कय खातिर यहु पत्रिका २०२२ साल मईहाँ बन्द हुई गवा । ईमेर जिला के पत्रकारिता क्षेत्र कय पहिल अध्याय हिँया समाप्त होत हए । ई दशक मईहाँ ५ ठव पत्रिका सिरिफ निकल पाईस अब शुरु होत हय बाँके जिला के पत्रिका क्षेत्र कय दूसर अध्याय ।
२०२२ साल फिर जगत बहादुर सिंह कय सम्पादन मईहाँ राष्ट्रदूत (मासिक)पत्रिका कय ४ अंक छापा गवा । अइसेनय २०१७ साल मईहाँ पंचायती व्यवस्था कय उत्पत्तिक बादीमा अंचल पंचायत कय पक्ष वाला साहित्यिक अउर सांस्कृतिक समिति कय तरफ से २०२५ साल मईहाँ बबु्रबाहन सिंह अउर गोपाल बहादुर सिंह कय सम्पादन मईहाँ भेरी अउर वादिमा भेरी सन्देश पाक्षिक पत्रिका प्रकाशन भवा । ई के पहिले स्व. खडग बहादुर सिंह, गोपाल बहादुर सिंह, अनिरुद्ध सिंह अउर इन्द्रमणि मानव कय सम्पादन मईहाँ अञ्चल पंचायत नाम कय द्वैमासिक पत्रिका ४ अंक तक निकला । यही कय बिचवा मईहाँ २०२१ साल मईहाँ नेपालगंज नगर पंचायत, नगर पंचायत बुलेटिन पाक्षिक पत्रिका मोहन लाल श्रेष्ठ कय सम्पादन मईहाँ कुछय अंक निकल पाईस । ई के अलावा स्व. महावीर प्रसाद गुप्ता अउर इन्द्रमणि मानव कय सम्पादन अउर पाटन दीन गुप्ता कय प्रकाशन मईहाँ अनुराधा मासिक नेपाली अउर हिन्दी भाषा मईहाँ कुछय अंक प्रकाशित भवा । इन्द्रमणि मानव अउर जगत बहादुर सिंह जी कय सम्पादन मईहाँ स्वराष्ट्र नाम कय पत्रिका भी छपय लगा । भेरी अञ्चल कय सदरमुकाम नेपालगंज मईहाँ पईसा कय कमिक खातिर ई बिचवा मईहाँ तमामन साहित्यिक मासिक बुलेटिन बन्द होतय गवा । जईसेन कि भेरी साहित्य विकास समिति कय तरफ से प्रेम प्रकाश मल्ल, नन्दराम लम्साल, वि. विकास अउर सनत रेग्मी कय सम्पादन मईहाँ सिर्जना त्रैमासिक, भेरी अनुसन्धान केन्द्र कय अउर चोलराज शर्मा, जर्नादन आचार्य जईसेन कय सम्पादन मईहाँ अनुसन्धान, महेन्द्र पुस्तकालय कय ओर से सनत रेग्मी अउर स्व. वि. विकास कय सम्पादन मईहाँ रहा महेन्द्र सौरभ सनत रेग्मी अउर दिनेश मणि त्रिपाठी कय सम्पादन मईहाँ रहय वर्तमान मासिक जइसन प्रकाशित भवा पत्रिका देखा गवा रहय ।
अईसेनय नारायण प्रसाद शर्मा गैरे अउर टुनानाथ भट्टराई जइसेन लोग शुभेच्छा गोजिका (मासिक) निकालेक प्रयास किहिन पर ई पत्रिका कय कुछय अंक सिरिफ निकल पाईस । बाद मईहाँ इके प्रकाशन रोकी दिहा गवा । इ कय अलावा २०३० साल पूर्व शैक्षिक निकाय कय तरफ से बहुत मेर त्रैमासिक, अद्र्ध साप्ताहिक, वार्षिक, वार्षिक बुलेटिन अउर सम सामायिक संकलन प्रकाशन होत देखा गवा रहय ।
यहिक विचवा मईहाँ २०३० साल से लियाकत अली अउर १९६९ कय वाद मईहाँ राम गोपाल वैश्य कुछ वर्षन तक नेपाली (हिन्दी दैनिक) अउर चेतना साप्ताहिक जईस पत्रिकन कय सम्वाददाता कय रुप मईहाँ काम किहिन । इके पहिले राम गोपाल वैश्य राष्ट्र ध्वनि साप्ताहिक, राष्ट्र पुकार साप्ताहिक जईस पत्रिका मईहाँ काम करत रहय । चेतना बद्री प्रसाद गुप्ता कय पत्रिका रहय । ई पत्रिका काठमाण्डु से निकलत रहय, राष्ट्रध्वनि, राष्ट्र पुकार जईस साप्ताहिक पत्रिका ई भी काठमाण्डुन से निकलत रहय । ईमेर बाँके जिला कय पत्रिकारिता क्षेत्र कय दूसर अध्याय भी हिँया खतम होत हय । अब हियाँ से बाँके जिला कय पत्रकारिता क्षेत्र कय तिसर अध्याय शुरु होत हय ।
२०११ साल से बाँके जिला मईहाँ पत्रिकारिता शुरु होत हय । गिरत परत ई धिरे–धिरे बडा होय लागत हय । २०३१ साल से बाँके कय पत्रकारिता अपने पांव कय उप्पर धिरे–धिरे खडा होय लगा । २०३१ साल से नेपालगंज से स्व. महावीर प्रसाद गुप्ता अउर विजय कुमार गुप्ता कय सम्पादन अउर श्रीमति किरण प्रभा गुप्ता कय प्रकाशन मईहाँ किरण साप्ताहिक निकलेक शुरु भवा । ई पत्रिका मईहाँ २०३६ साल कय बाद मईहाँ प्रधान सम्पादक कय रुप मईहाँ पन्नालाल गुप्ता ‘चच्चा जी’ कार्यरत भए । अईसन २०३१ साल मईहाँ सेती अंचल कय धनगढी से स्व. प्रभात भण्डारी कय सम्पादन अउर प्रकाशन मईहाँ हिँया नेपालगंज से सुरमा सरोवर साप्ताहिक २०३४ साल से नेपालगंज मईहाँ दर्ता हुईके छापा गवा रहय । २०३१ साल से भैरहवा से प्रकाशित निष्पक्ष ध्वनि साप्ताहिक अउर काठमाण्डु से हिमाली हुलाक साप्ताहिक कय क्षेत्रीय कार्यालय खोलिकय इके क्षेत्रीय प्रतिनिधि कय रुप मईहाँ पूर्णलाल चुके अउर २०३५ साल कय तरफ मईहाँ विचार साप्ताहिक कय अंचल प्रतिनिधि कय रुप मईहाँ हेमन्त कर्माचार्य सकृय भएँ । २०३४ साल मईहाँ लुम्बिनी अंचल से लेखनाथ ज्ञवाली आएके मातृभूमि साप्ताहिक कय प्रतिनिधित्व किहिन । पहिले हिँया नेपाली पत्रिका का बेचय कय व्यवस्था नाय रहय । ई कमी का पुरा करय कय खातिर भेरी न्यूज सेन्टर नाम कय पुस्तक कय दुकान बागेश्वरी मन्दिर कय मोड मईहाँ शुरु भवा । २०३२ साल के बाद मईहाँ मो. लियाकत अली कय सम्पादन मईहाँ संकल्प साप्ताहिक, जित बहादुर वि.सी. कय सम्पादन मईहाँ पर्यवेक्षक साप्ताहिक, अउर पूर्ण लाल चूके कय सम्पादन मईहाँ जनमत दैनिक निकला । अईसेन २०३७ साल मईहाँ प्रेम कैदी ‘मासिक’ कय अस्थाई दर्ता नं. लईके कुछय समय तक ई पत्रिका निकालिन, कुछय दिन बाद ई पत्रिका बन्द हुई गवा । २०३९ साल मईहाँ आवा सरकार कय नवा प्रेस नीति । इके बाद मईहाँ पत्रिका दर्ता करावय कय नीति कुछ सरल हुई गवा । ई कय बाद हिँया पत्रिकन कय बाढी आई गवा । यही समय मईहाँ स्व. योगेश्वर प्रसाद मिश्रा ‘वैद्य’ जी के लरिका प्रमानन्द मिश्र हिंया प्रकाश साप्ताहिक दर्ता कराय के छापय लागे । यही समय मईहाँ पूर्णलाल चुके कय सम्पादन मईहाँ अउर सुशीला चूके कय प्रकाशन मईहाँ जनमत अर्ध साप्ताहिक नियमित रुप से निकलय लाग ।
अईसेन यही बेरिया मईहाँ २०४० साल मईहाँ दर्ता भवा पन्नालाल गुप्ता ‘चच्चा जी’ कय सम्पादन अउर प्रकाशन मईहाँ जय नेपाल दैनिक अउर स्व. प्रभात भण्डारी कय सम्पादन प्रकाशन मईहाँ नेशनल टाईम्स दैनिक कुछय समय तक निकला फिर बन्द हुई गवा । ई वेरिया मईहाँ मो. लियाकल अली कय संकल्प साप्ताहिक, जित बहादुर वि.सी कय पर्यवेक्षक साप्ताहिक, राजेन्द्र सिंह कय निर्भिक साप्ताहिक, प्रेम कैदी कय युगधारा साप्ताहिक ई पत्रिका वाद मईहाँ काडमाण्डु मईहाँ चला गवा ।
राधेश्याम शर्मा कय आदर्श मञ्च पाक्षिक बाद मईहाँ साप्ताहिक बन गवा । गोपाल बहादुर सिंह कय पत्रिका भेरी सन्देश साप्ताहिक, मणि लाल गुप्ता कय पत्रिका लोकमत साप्ताहिक, राम गोपाल वैश्य के शंखनाद साप्ताहिक दर्ता होइकय निकलय लाग हियाँ । सब भईयनका बतावेक जरुरी हय कि असल मईहाँ राम गोपाल वैश्य लोकमत साप्ताहिक दर्ता कराईन अउर इके सम्पादक बनाईन मणिलाल गुप्ता का ऊ ई पत्रिका अपनय महालक्ष्मी छापा खाना कय अफिस मईहाँ लिखत रहय हिँयए से प्रेस मईहाँ छापत अउर बांटत रहय । यही दशकिया मईहाँ महेन्द्र बहुमुखी कैम्पस कय प्राध्यापक तुलसीमान अमात्य, पशुपति तिमिल्सिेना कय सम्पादन मईहाँ जनजागृति सांस्कृतिक मञ्च कय ओर से एक पत्रिका निकला ‘चिप्लेटी’ ई पत्रिका कर्मचारी मिलन केन्द्र बाँके कय ओर से कुछ वरस तक मिलन वार्षिक मुखपत्र प्रकाशन करतय आवा बन्द मईहाँ ई बन्द हुई गवा ।
नेपालगंज से जउन पत्रिका दर्ता हुई कय निकलत रहय ऊ पत्रिका का प्रेस काउन्सिल केरी ओर से वर्गीकरण होत रहय । ई पत्रिका वर्गीकरण मईहाँ जब परत रहय राज्य उनका सहयोग मईहाँ सूचना विभाग कय तरफ से अखबारी कागज नेशनल ट्रेडि· लि. नेपालगंज से मुहैय्या करावत रहय । ई मेर ई लेख मईहाँ तिसर अध्याय के भी हिँया समाप्ति होत हय । अब आवत हय बाँके जिला केरि पत्रकारिता क्षेत्र कय नेपालगंज मईहाँ चौथा अध्याय हियाँ से शुरु होत हय ।
सुरमा सरोवर साप्ताहिक कय संस्थापक सम्पादक प्रभात भण्डारी कय असमायिक निधन कय बाद मईहाँ २०४७ मईहाँ प्रजातन्त्र पुर्नबहाली कय तुरुन्तय बाद मईहाँ भादौ महिना २०४७ मा सुरमा सरोवर साप्ताहिक कय नाम परिवर्तन करिकय चौतारी साप्ताहिक कय नाम से रखीकय उनकय बड्का लरिका प्रतिक भण्डारी अईसेनय दिवाकर शर्मा, नारायण ज्ञवाली अउर राम प्रसाद गौतम जईसेन लोग मिलिकय ई पत्रिका निकलाय लागे मूला २०४८ साल भाद्रौ महिना कय बाद मईहाँ इके प्रकाशन बन्द हुई गवा ।
फिर इका निकालय कय कोई हिम्मत नाय किहिस । नेपालगंज मईहाँ जनमत अद्र्ध साप्ताहिक अफसेट प्रविधि से निकलय वाला पहिल पत्रिका होय । २०५२÷०९÷१४ मईहाँ पहिल बार ई पत्रिका अफसेट प्रेस से छपा । २०५४ साल से ई पत्रिका आज तक निकलतय आवा हय । ई पत्रिका से हेमन्त कर्माचार्य, जे. पाण्डे, नरेन्द्र जंग पिटर, राजेन्द्र ज्ञवाली जुडे रहे । बाँके जिला मईहाँ जिला प्रशासन से २०४७÷०४८ कय बाद मईहाँ माधव कुमार शाह कय सम्पादन अउर शकुन्तला शाह कय प्रकाशनत्व मईहाँ नयाँ नेपाल टाईम्स, महेन्द्र राज शर्मा कय विचार साप्ताहिक निकालय केर प्रयास भवा, पर नाम टकराय गवा ई मारे विचार साप्ताहिक बाद मईहाँ हलचल साप्ताहिक कय नाम से निकला । बाद मईहाँ इके नाम नयाँ हलचल रक्खा गवा । यही वेरिया मईहाँ उदयसिंह श्रेष्ठ निष्पक्ष ध्वनि साप्ताहिक अउर पश्चिमाञ्चल साप्ताहिक, विकल्प साप्ताहिक, दैनिक गतिविधी, वासुदेव श्रेष्ठ कय उज्यालो साप्ताहिक, त्रिलोचन शर्मा अउर राजेन्द्र ज्ञवाली परिक्रमा साप्ताहिक, ई का ‘क्रान्तिदूत नाम परिवर्तन’ करिकय निकाला गवा । अइसेनय विद्यु प्रसाद कायस्थ नेपालगंज पोष्ट निकालिन । ई समय मईहाँ जीत बहादुर बि.सी. कय पत्रिका खुब चलत रहय । ऊ नगरपालिका रोड मईहाँ गौरा छापाखाना भी लगवाईन मूला बाद मईहाँ गौरा छापाखाना बेची कय भारत कय कउनौ तर्फ निकलीगे दशन वरस बाद जनयुद्ध के समय मईहाँ नेपालगंज मा ऊ देखे गए । फिर ऊ हियाँ से गायब हुई गए, कहाँ गए ई बारे मईहाँ कोईक नए मालूम हय ।
ई के बाद मईहाँ नेपालगंज से मो. हारुन हलवाई नशेमन साप्ताहिक निकालिन, अईसेनय हेमन्त कर्माचार्य कय सम्पादन मईहाँ कालपृष्ठ साप्ताहिक निकला बाद मईहाँ ई पत्रिका दैनिक बन गवा । ई के बाद मईहाँ रेशम बिरही कय सम्पादन अउर प्रकाशन मईहाँ ललितपुर मईहाँ दैनिक कय रुप मा दर्ता भवा समानान्तर बाँके जिला से साप्ताहिक कय रुप मईहाँ निकलय
लाग । सन् १९९८ मईहाँ महेन्द्र बहुमुखी क्याम्पस कय सहप्राध्यापक राजकुमार सुवेदी अउर प्रकाश लामिछाने कय सम्पादन मईहाँ बौद्धिक लेख माला (मासिक) निकलय लाग, बाद मईहाँ ई बन्द हुई गवा । एक माध्यमिक विद्यालय कय प्राध्यापक लोकनाथ बर्मा अवधि भाषा मईहाँ ग्रामदीप साप्ताहिक निकालिन बाद मईहाँ ऊ ई पत्रिका कईहाँ एड्स साप्ताहिक नाम छापी कय निकारय लागे अजय कुमार गुप्ता आज को सामना साप्ताहिक निकालिन । ई पत्रिका अवही तक छपत हय । शिव डोटेल कय सम्पादन अउर बिष्णु प्रसाद श्रेष्ठ कय प्रकाशनत्व मईहाँ २०५६ असोज २० गते से नेपालगंज एक्सप्रेस दैनिक प्रकाशित भवा । अईसेनय २०५६ भाद्रौ महिना मईहाँ शरण के.सी. कय प्रकाशन, सम्पादन मईहाँ बागेश्वरी टाईम्स
निकरा । ई पत्रिका श्याम कुमार शर्मा से प्रकाशित भवा रहय । ई दैनिक मईहाँ शरद के.सी., कृष्ण अधिकारी, झलक गैरे जईस लोग लाग रहय । हिँया महिला पत्रकार भी बहुतय भंई । मुना श्रेष्ठ उज्यालो साप्ताहिक मईहाँ, किरण प्रभा गुप्ता ‘किरण’, सुशीला चुके गतिविधि, अउर जनमत मईहाँ, सुमनरानी मिश्र ‘प्रकाश साप्ताहिक’ मईहाँ, शकुन्तला शाह (नयाँ नेपाल टाईम्स), अनुषा ढुगाना (मातृ सन्देश) दीक्षा कोईराला, मोहना अंसारी, तारा रोकाय जईसन महिला पत्रकारिता क्षेत्र से जुडी रहय । अईसेनय पत्रकारिता क्षेत्र से सुलोचना गौतम, नयाँ सडक बर्दिया अउर सिर्जना आचार्य फिचर सेवा मईहाँ लगी रहीं । काठमाण्डु जईसन ठऊँवा से पत्रकारिता यज्ञ विक्रम शाह, सिराजुद्दीन खान, जे पाण्डे, रुद्र खड्का, कृष्ण अधिकारी, शुक्रऋषि चौलागाई, सम थापा, तेज कुमार शर्मा, गोपी बुढा, जनक नेपाल, रामेश्वर बोहरा, झलक गैरे, शंकर खनाल, यमनाथ घिमिरे, जय नारायण शाह, जईसेन पत्रकार किहिन नेपालगंज मईहाँ रणप्रसाद राना मिनाम गोराक साप्ताहिक निकालिन । पत्रकारिता क्षेत्र से पवन जयसवाल, मेराज सलमानी, जईस लोग जुडे रहे । विद्युतीय सञ्चार माध्यम से पोषण के.सी., शरद के.सी., शिव डोटेल, जईस लोग लाग रहे । नेपालगंज से अउर तमाम पत्रिका दर्ता भए ऊ पत्रिका कय बारेम उप्पर नाय जिकिर कर पाएन हन । ऊ पत्रिका हय प्रेम कैदी कय युगधारा साप्ताहिक, टेक बहादुर के.सी. अउर लियाकल अली कय रोसम (बालबिम्ब) मासिक, सनत रेग्मी, दिनेश मणि त्रिपाठी– वर्तमान, त्रिलोचन शर्मा मरासिनी– क्रान्तिदूत, नारायण प्रसाद शर्मा गैरे, युवराज भट्टराई कय शुभेच्छा, शिवलाल पाण्डे हाल खबर, सलाऊद्दीन अख्तर एभरेष्ट टाईम्स अऊर सलाऊद्दीन अख्तर कय उर्दु पत्रिका तोहफा, कर्ण बहादुर थापा के न्यायिक ध्वनि, उदय बहादुर सिंह श्रेष्ठ पश्चिमाञ्चल साप्ताहिक, दिवाकर शर्मा–नव संसार, श्रीमति मालती शर्मा अधिकारी अऊ राम बाबु अधिकारी कय अञ्जली (साहित्यिक) विद्यु प्रसाद कायस्थ– नेपालगंज दैनिक, राजकुमार सुवेदी– बौद्धिक लेखमाला (मासिक), प्रेम सागर पौडेल– द म्यासेन्जर साप्ताहिक, पूर्णलाल चुके– उदय (द्धिमासिक), खेम बहादुर भण्डारी– अभियान दैनिक, विकेश कुमार श्रेष्ठ– नयाँ अनुशीलन (मासिक), बिष्णु प्रसाद श्रेष्ठ– नेपालगंज एक्सप्रेस, शरद के.सी.– बागेश्वरी टाईम्स, प्रवीण राज गौतम– हेलो म्याग्जीन, नेपालगंज टुडे– युनियन काँग्रेस अउर रामकृष्ण अधिकारी– हाम्रो सन्देश प्रकाशित भवा रहय । हियाँ पर नेपालगंज पत्रकारिता कय चौथा अध्याय समाप्त होत हय । अब हियाँ से ई क्षेत्र कय पाँचवा अध्याय शुरु होत हय ।
बाँके जिला मईहाँ पत्रकारिता दशकन पहिले मिसन पत्रकारिता से शुरु भवा रहय । प्रजातन्त्र कय खातिर हिँया मिसन पत्रकारिता शुरु भवा । प्रजातन्त्र केर शुरु कय बाद मईहाँ हियाँ व्यावसायिक पत्रकारिता कय शुरुआत हुई गवा । अवही बहुतय पत्रिका निकलत हय कुछतौ रंगीन मईहाँ निकलय लाग हंय । ई मईसे मुख्य पत्रिका हय अक्षरी पोखरेल कय सम्पादन मईहाँ निकलयवाला महिला सञ्चार साप्ताहिक, जय नारायण शाह– अन्तराल पोष्ट दैनिक, नविन गिरी– नेपालगंज परिवेश दैनिक, श्रीधर सुवेदी– न्यूज नमस्ते दैनिक, चन्द्रशेखर पाण्डे– न्यू मधेश एक्सप्रेस दैनिक, झलक गैरे– दैनिक नेपालगंज, लक्ष्मण सापकोटा– पश्चिम खबर दैनिक, चेतकान्त भट्टराई– पिपल बोट दैनिक, ताराचन्द्र योगी– प्रभात घोषणा दैनिक, रुद्र सुवेदी– मध्यपश्चिम दैनिक, मेघराज ओली– मध्यपश्चिम सन्देश दैनिक, विनोद पौडेल– मिसन टुडे दैनिक, दामोदर भण्डारी– सद्भाव दैनिक, भेषराज बस्नेत– हाम्रो समाचार सन्देश दैनिक, मञ्जु पाठक– मधेश जागरण, नरेन्द्रनाथ योगी– कर्णाली सन्देश साप्ताहिक, मधु पौडेल–अभियान न्यूज, विष्णु बेल्वासे– कोहलपुर टाईम्स साप्ताहिक, यम रावत– कोहलपुर साप्ताहिक, मधु पौडेल– दैनिक खबरी, सन्तोष चौधरी– गुड न्यूज, आशिष गुप्ता– न्यूज यथार्थ साप्ताहिक, कृष्ण चौधरी– परगा साप्ताहिक, नमस्कार शाह– बागेश्वरी असल शासन साप्ताहिक, नरेन्द्र थापा– युगान्तर पोष्ट साप्ताहिक, राजेशकुमार मिश्र– राष्ट्रिय स्वरुप साप्ताहिक, बब्लु खान– बैलेट साप्ताहिक, सुभाष कुमार गुप्ता– सत्यखबर साप्ताहिक, चन्द्रेश्वरराज त्रिपाठी– समाज जागरण साप्ताहिक, हरि तिमिल्सिना– ऋतम्भरा दैनिक, मधु पौडेल– न्यूज फ्लैस, प्रभात देवकोटा– अवध पोष्ट, भगतराम थारु– सागरमाथा गन्तब्य दैनिक, जयसिंह के.सी.– मार्ग रेखा कोहलपुर, अशोक विष्ट– हाम्रो चुनौति साप्ताहिक, गोबिन्द शर्मा– लोकप्रिय सन्देश दैनिक, भिमप्रसाद पौडेल– ज्ञानोदय पोष्ट दैनिक, डबल बहादुर महतरा– युगिन बहस, सम थापा– सत्य पत्र, निदेश श्रीवास्तव– दिप ज्वाला, जईसेन तमाम पत्रिका दर्ता भए ईमा तमाम पत्रिका निकलत हय अउर तमाम बन्द भी हुई गए । कब पत्रिका निकलत हय कब बन्द हुई जात हय इके बारेम केहु कईहाँ कुछ थाह नाय होत ।
२०७६ फागुन महिना तक सब ठीक ढंग से चलत रहय । २०७६ चैत्र ११ गते नोभल कोरोना (कोभिड–१९) कय प्रकोप अईसेनय बढा कि नेपालगंज कय सभय पत्रिका कय हालत बिगरिगा । ई मा कालपृष्ठ दैनिक भी बहुतय प्रभावित
भवा । ई पत्रिका अवहुं निकलत हय ।
ई मा सांचपन ई हय कि हियाँ पत्रकारिता कय जड बहुत गहिर हुई गवा हय । मूला पत्रिकन मईहाँ राजनीतिक दलन कय पकड बहुतय हय । ईमारे पत्रिका स्वतन्त्र ढंग से कलम नाय चलाय पावत हय । जऊन पत्रकार राजनीतिक दल कय पक्ष मईहाँ काम करत हय उन्ही पत्रकार कईहाँ ई क्षेत्र कय पत्रकारन कय अग्रणी व्यक्ति बनाय दिहाँ जात हय । जो हिँया पत्रकारिता कय जर जमाईन ऊ पत्रकार कय हियाँ कउनौ जिकिर नाय होत हय । ई बात बहुतय दुर्भाग्यपूर्ण हय ।
बाँके जिला मेर पत्रिकन कय व्यावसायिक रुप मईहाँ शुरुवात करय कय काम किहिस नेपाल प्रेस
ईन्स्टिच्यूट । ऊ हियाँ नेपालगंज कय सुर्खेत रोड मईहाँ सन १९९५ मईहाँ भाडा मईहाँ क्षेत्रीय संचार श्रोत केन्द्र शुरुवात किहिस, केन्द्र कय पहिल क्षेत्रीय प्रबन्धक भए तोया गौतम, इके बाद भए राजन छतकुली, हस्त गुरुङ, यम बहादुर, पिताम्बर कँडेल २०५२ साल मईहाँ केन्द्र कय क्षेत्रीय प्रमुख बनावा गवा मो. आरिफ अन्सारीका, ऊ हियाँ २६ साल से प्रमुख रहीकय काम करतय आंए हय । क्षेत्रीय संचार श्रोत केन्द्र नेपालगंज कय अवही कुछय वरस पहिले वार्ड नं. १३ बुलबुलिया गांव मईहाँ भवन खरीद कय हुवाँ स्थापित किया गवा । ‘चच्चा’ पन्नालाल गुप्ता, हेमन्त कर्माचार्य, लियाकत अली, पूर्णलाल चुके, मोहना अंसारी, दीक्षा कोईराला, अनुषा ढुगाना, लियाकल अली, अजय कुमार गुप्ता, राम गोपाल वैश्य, जईसन पचासौं पत्रकार हियाँ से व्यावसायिक पत्रिका कय बारे मईहाँ तमामन प्रशिक्षण लिहिन रहय ।
पत्रकारन कय पास कम्प्यूटर नाय रहय । ई कमी का दुर करय कय खातिर केन्द्र हियाँ पत्रिका कय टाईप, सेटि· अउर ले–आउट करय केर खातिर तमाम सुविधा मिलत रहय । आज को सामना साप्ताहिक, नशेमन साप्ताहिक जईस पत्रिका हिँया टाईप, सेटि·, ले–आउट होईकय बाद मईहाँ अफसेट प्रेस मईहाँ छपय जात रहय । हियाँ ई काम मो. आरिफ अन्सारी बहुतय किहिन ई मारे जब व्यावसायिक पत्रिका कय विकास के बारेम बात होईहय, तो क्षेत्रीय संचार स्रोत केन्द्र कय जिकिर भी हिँया जरुरै होईहय । (स्रो. समाज जागरण साप्ताहिक)