नेपालगन्ज, १० मंसिर – प्रत्येक वर्ष झै यस वर्ष पनि धार्मिक पर्यटकीय स्थल श्री १००८ हडिया बाबा आश्रममा धार्मिक मेला आयोजना हुने तयारी पुरा भएको जनाईएको छ ।
नेपालगन्ज उपमहानगरपालिका वडा नं. ६ फुल्टेक्रा स्थिति रहेको धार्मिक पर्यटकीय स्थल श्री १००८ हडिया बाबा आश्रममा मेला आयोजना हुने सम्पूर्ण तयारी पुरा भएको मेला आयोजक समितिद्वारा जानकारी गराईएको छ ।
धार्मिक पर्यटकीय स्थल हडिया बाबा आश्रममा प्रत्येक वर्ष ७ सय देखि १ हजारसम्म सन्त महत्माहरुको सहभागिता हुने गरेको छ । यस वर्ष पनि १ हजार बढी साधुसन्तहरुको सहभागिता हुने अनुमान मेला आयोजक समितिले जनाएको छ ।
मेला आयोजक समितिका अनुसार राप्ती नहान मेला कै दिनदेखि शुरु हुने अथार्त मंसिर १३ गतेदेखि मंसिर १७ गतेसम्म सञ्चालन हुने मेलामा धार्मिक नाटक मञ्चन हुनुका साथै भक्तजनहरुलाई दैनिक भण्डारा, प्रसाद ग्रहण, कन्य पूजन, रुद्री पुजालगायतका कार्यहरु हुनुका साथै सहभागी साधुसन्तहरुलाई उपहार स्वरुप दक्षिण, कम्बल आदि वितरण गरिने परम्परा रहि आएको तथा सोही अनुसारलाई यस वर्ष पनि हुने बताएका छन् ।
यस वर्ष पनि श्री रामलीला नाटक मञ्चनको लागि भारतबाट कलाकारहरु आउने जानकारी गराउँदै भगवान रामको कथा, लिला मञ्चन हुने मेला आयोजक समितिले जनाएको छ ।
