नेपालगन्ज, ३० बैशाख – नेपालगन्ज उपमहानगरपालिका वडा नं. १२ को कार्यालयलाई आईसोलेसन वार्ड बनाइएको छ । चारजना महिला र १० जना पुरुषलाई राख्न सकिने गरि १४ सैय्याको अस्थाई आईसोलेसन तयार गरिएको वडा अध्यक्ष बुद्धीसागर सुवेदीले जानकारी दिनुभयो ।
नेपालगन्ज उपमहानगरपालिकाका प्रमुख डा. धवलशम्शेर राणा र उपप्रमुख उमा थापा मगरले बिहिवार वडा कार्यालयमा आईसोलेसनको उद्घाटन गर्नुभयो । सो अवसरमा नगर प्रमुख राणाले कोभिड संक्रमण अन्त्य हुने निश्चित नभएका कारण भविष्यमा आईपर्न सक्ने अवस्थालाई मध्यनजर गर्दै तयारी गर्नुपर्ने बताउनुभयो ।
उहाँले वडा कार्यालयमा आईसोलेसन भएपछि वडाबासीलाई सहज हुने बताउनुभयो । वडाअध्यक्ष सुवेदीका अनुसार भाडामा बस्ने र घरमा आईसोलेसनको सहज व्यवस्था हुन नसक्नेहरुका लागि लक्षित गरि आईसोलेसन तयार गरिएको हो । केहीदिनमा चिकित्सक र औषधी सहितको घरदैलो अभियान सञ्चालन गरिने कार्यालयले जनाएको छ ।
नेपालगन्जमा यसअघि वडा नम्बर ४ ले दुईजना चिकित्सकसहित १० सइयाको आईसोलेसन सञ्चालन गरिरहेको छ । उपमहानगरपालिकाले ह्वाईटहाउस र रामलिला मैदानमा आईसोलेसन केन्द्र सञ्चालन गरिरहेको छ । वडाहरुमा चिकित्सक सहितको घरदैलो र सेनिटाईजर गर्ने कार्य चलिरहेको उपप्रमुख उमा थापा मगरले जानकारी दिनुभयो ।