राप्तीसोनारी, ५ बैशाख – राप्तीसोनारी गाउँपालिकामा हालै सरुवा भएर आउनु भएका प्रमुख प्रशासकीय अधिकृत लोकबहादुर शाहीलाई एक कार्यक्रमका बीच स्वागत गरिएको छ । राप्तीसोनारी गाउँपालिका कार्यालयमा आईतबार(आज) एक कार्यक्रमका बीच उहाँलाई स्वागत गरिएको हो । राप्तीसोनारी गाउँपालिका उपाध्यक्ष धनीकुमारी खत्रीको सभापतित्वमा भएको कार्यक्रममा निर्वतमान प्रमुख प्रशासकीय अधिकृत नरबहादुर बिक, शिक्षा शाखा प्रमुख जीवन न्यौपाने लगायत विभिन्न शाखाका प्रमुख तथा कर्मचारीले स्वागत गर्नु भएको हो ।
स्वागत कार्यक्रमलाई सम्बोधन गर्दै उपाध्यक्ष खत्रीले कर्मचारी र जनप्रतिनिधीबीचको सहकार्यले मात्र गाउँपालिकाको विकास सम्भव भएको बताउनु भयो । जनप्रतिनिधी र कर्मचारीबीचको सम्बन्ध नङ र मासु जस्तै भएको उल्लेख गर्दै उहाँले कर्मचारीलाई जनप्रतिनिधीले काम गर्ने वातावरण सिर्जना गरिरहेको बताउनु भयो ।
सो क्रममा प्रमुख प्रशासकीय अधिकृत शाहीले आफु राप्तीसोनारीमा कार्यरत रहदासम्म इमान्दारी पुर्वक काम गर्ने प्रतिवद्धता जनाउनु भयो । उहाँले जनप्रतिनिधी र आफ्ना सहकर्मी कर्मचारीसँग मिलेर काम गर्ने बताउनु भयो । गाउँपालिकाले नयाँ आउने र सरुवा भएर अन्यत्र जाने प्रमुख प्रशासकीय अधिकृतलाई स्वागत तथा बिदाई कार्यक्रम गर्दै आएको छ । अस्वस्थ भएका कारण राप्तीसोनारी गाउँपालिका अध्यक्ष लाहुराम थारु भने सो कार्यक्रममा उपस्थित हुन नसकेको गाउँपालिकाका प्रशासन शाखा प्रमुख लोकेन्द्र चन्दले जानकारी दिनुभयो ।
