नेपालगन्ज, १० जेठ – नेपालगन्ज रंगशालामा एन्फाग्रास रुट फुटबल प्रशिक्षण कार्यक्रम सम्पन्न भएको छ । बालबालिकालाई मानसिक र शारीरिक रुपमा स्वस्थ राख्दैं फुटबल खेलप्रति आर्कषित गर्ने उद्देश्य नेपालगन्ज उपमहानगरपालिकाको आर्थिक सहयोग र बाँके जिल्ला फुटबल संघको आयोजनामा गत कात्तिक १६ गतेदेखि ग्रासरुट फुटबल प्रशिक्षण कार्यक्रम सुरु भएको थियो ।
ग्रास रुट फुटबल प्रशिक्षण कार्यक्रममा सहभागि बालबालिकालाई समापन कार्यक्रमका प्रमुख अतिथी नेपालगन्ज उपमहानगरपालिका शिक्षा तथा खेलकुद महाशाखा प्रमुख गोर्खबहादुर थापा, आयोजक बाँके जिल्ला फुटबल संघका अध्यक्ष एवम् अखिल नेपाल फुटबल संघका केन्द्रिय सदस्य भोजराज शाही, कार्यक्रम संयोजक श्यामसुन्दर मल्ल, महिला फुटबल समिति बाँके अध्यक्ष नितु चन्द शाहलगायतले प्रदान गर्नु भएको थियो । ग्रासरुट र विभिन्न उमेर समुहका कार्यक्रममार्फत संघले एक वर्षमा करिब ३ हजार बालबालिकालाई फुटबलमा जोडने प्रयास गरिरहेको अध्यक्ष शाहीले बताउनु भयो ।
नेपालगन्ज रंगशालामा हप्ताको दुई दिन बिहिबार र शुक्रबारको दिन राष्ट्रिय खेलकुद परिषदका फुटबल प्रशिक्षक रविन्द्रकुमार श्रेष्ठ, सानु तामाङ्ग, एन्फा प्रशिक्षक युवराज शाही, भोजबहादुर शाही, भिमजंग शाह, टोपबहादुर महतारा, स्मित तामाङ्गलगायतको टिमले बालबालिकालाई फुटबलका आधारभुत सीपहरु सिकाउने काम गरेको थियो ।
बालबालिकालाई फुटबल खेलमा अभिरुच बढाउन ग्रासरुट कार्यक्रम महत्वपुर्ण भएकोले यसलाई निरन्तरता दिनुपर्ने प्रमुख अतिथी थापाले बताउनु भयो । उहाँले भन्नु भयो, ‘हामीलाई खुसी लाग्यो रंगशालामा यसरी बालबालिका उत्साही भएर खेलिरहनु भएको छ । सानै उमेर देखि बालबालबालिकाहरुमा खेलकुदप्रति आर्कषित गर्न सके भविष्यमा राष्ट्रिय स्तरका खेलाडी उत्पादन गर्न सकिन्छ । कार्यक्रमलाई थप प्रभावकारी बनाउन उपमहानगरपालिकाले सहयोग गर्नेछ ।’ नेपालगन्ज उपमहानगरपालिकाले ग्रासरुट प्रशिक्षण कार्यक्रमलाई ३ लाख आर्थिक सहयोग गरेको थियो ।
अध्यक्ष शाहीले आर्थिक अभावका कारण रोकिन लागेको ग्रासरुट फुटबल प्रशिक्षण कार्यक्रमलाई उपमहानगरपालिकाले आर्थिक सहयोग गरेर निरन्तरता दिने कार्यमा सहयोग गरेको बताउनु भयो । बाँके जिल्ला फुटबल संघले ग्रासरुट फुटबल प्रशिक्षण कार्यक्रमलाई अब निरन्तर रुपमा सञ्चालन गरेर बालबालिकालाई फुटबल खेलप्रति आर्कषित गर्ने योजना बनाएको शाहीले बताउनु भयो ।
ग्रास रुट फुटबल प्रशिक्षण कार्यक्रममा बालबालिकाको सक्रिय सहभागिताले संघलाई थप काम गर्न उत्साही बनाएको महिला फुटबल समिति अध्यक्ष शाहले बताउनु भयो ।