नेपालगन्ज, २० कात्तिक – कर्णाली तथा सुदूरपश्चिमको मौलिक भाषा, संस्कृति र संगीतलाई समेटिएको गायक तथा मोडेल सुनिल सिंह ठकुरीको नयाँ गीत ‘ओ मेरी छोराटी’ को म्युजिक भिडियो सार्वजनिक भएको छ । पश्चिम नेपालको सांस्कृतिक पहिचानलाई गीत–संगीतमार्फत उजागर गर्ने उद्देश्यसहित तयार पारिएको उक्त म्युजिक भिडियो शुक्रबार नेपालगन्जमा आयोजित विशेष समारोहबीच सार्वजनिक गरिएको हो ।
वरिष्ठ संगीतकार ओम शर्मा र गायक सुनिल सिंह ठकुरीले संयुक्त रूपमा गायक ठकुरीकै युट्युब च्यानलमार्फत म्युजिक भिडियो सार्वजनिक गर्नु भएको हो । बास नेपालको आयोजनामा सम्पन्न कार्यक्रममा गीत तथा भिडियो निर्माणमा संलग्न कलाकार, प्राविधिक र संगीतप्रेमीहरूको उपस्थिति रहेको थियो ।
कर्णाली क्षेत्रको भाषा, भाका र सांस्कृतिक परिवेशलाई जीवन्त रूपमा प्रस्तुत गरिएको गीतको छायांकन कर्णाली नदीको पुलसहित चिसापानी आसपासका विभिन्न रमणीय स्थानमा गरिएको छ । पश्चिम नेपालको प्राकृतिक सौन्दर्य र स्थानीय मौलिकतालाई दृश्यमा उतार्ने प्रयास गरिएको गायक ठकुरीले बताउनु भयो ।
सुनिल सिंह ठकुरी र सदिक्षा कँटेलको स्वर रहेको ‘ओ मेरी छोराटी’ मा नवीन रावलको शब्द तथा संगीत रहेको छ । सुरज पाण्डेको निर्देशनमा तयार भएको भिडियोमा भूगोल कुमार कार्की, करिष्मा शाही ठकुरी, सुनिल सिंह ठकुरी, दिनेश कठायत काजी र दिनेश रेग्मीले अभिनय गर्नु भएको छ । भिडियोको छायांकन विशाल परियारले गरेका हुन् भने शृंगारको जिम्मेवारी रवि केसीले सम्हालेका छन् । तुलसी देवी फिल्म प्रालिले निर्माण गरेको भिडियोको मिडिया प्रमोसन पार्टनर कालपृष्ठ दैनिक रहेको छ ।
कार्यक्रममा बास नेपालका कार्यकारी निर्देशक नमस्कार शाहले स्वागत मन्तव्य राख्नु भएको थियो । सो अवसरमा गायक ठकुरीले आफ्ना गीत प्रस्तुत गर्दै उपस्थित दर्शकलाई सांगीतिक मनोरञ्जन समेत प्रदान गर्नु भएको थियो । बास नेपालका अध्यक्ष शिवकुमार वर्माले गायक ठकुरीसहित सम्पूर्ण निर्माण टोलीलाई सफलताको शुभकामना व्यक्त गर्नु भयो ।
आफ्नै पश्चिमेली भाषामा गीत गाउन पाउँदा निकै खुसी र उत्साहित भएको गायक ठकुरीले बताउनु भयो । उहाँले भन्नु भयो, ‘पहिलो पटक सुदूरपश्चिमको संस्कृति र मौलिकतालाई चिनाउने गीत गाउन पाउँदा निकै खुसी लागेको छ । म निकै उत्साही छु । आफ्नै पश्चिमेली भाषाको गीतलाई मेरा प्रिय स्रोत तथा दर्शकले माया गर्नुहुनेछ भन्ने विश्वास लिएको छु ।’
भिडियोमा अभिनय गरेका कलाकार भूगोल कुमार कार्कीले सुदूरपश्चिमको मौलिकता झल्काउने गीतमा अभिनय गर्न पाउँदा गर्व महसुस भएको बताउनु भयो । सुदुरपश्चिमको भाषालाई र क्षेत्रलाई चिनाउन गीतले सहयोग गर्ने मोडेल करिश्मा शाही ठकुरीले बताउनु भयो ।
नेपाली गीत–संगीतमा आफ्ना सांगीतिक प्रस्तुति र म्युजिक भिडियोमार्फत परिचित हुँदै आएका ठकुरीले ‘ओ मेरी छोराटी’ मार्फत पश्चिम नेपालको भाषा, भाका र सांस्कृतिक पहिचानलाई फराकिलो दर्शकवर्गसम्म पु¥याउने प्रयास गर्नु भएको छ । स्थानीय भाषा र संस्कृतिमा आधारित गीत–संगीतको प्रवद्र्धनमा यस गीतले थप योगदान पु¥याउने अपेक्षा गरिएको छ ।