नेपालगन्ज, ९ असोज – जिल्लाका विभिन्न आईसोलेसनमा रहेका ५ जना निको भएर घर फर्किने भएका छन् ।
भाद्र २६ गते कोरोना संक्रमित देखिएका उनीहरु आज शुक्रबार डिस्चार्ज भई घर फर्किने भएको स्वास्थ्य कार्यालय, बाँकेका फोकल पर्सन नरेशबाबु श्रेष्ठले बताउनुभयो ।
हालसम्म बाँके जिल्लामा १ हजार ७ सय ५० जना कोरोना संक्रमित देखिएकोमा उपचारपछि १ हजार ३ सय ६१ जना डिस्चार्ज भई घर फर्किसकेका छन् भने विभिन्न आईसोलेसनमा ३ सय ८४ जना रहेको फोकलपर्सन श्रेष्ठले बताउनुभयो ।
उहाँले बाँकेमा बिरामी निको हुने प्रतिशत ७७.७७ रहेको छ भने बिरामी मृत्यु दर ०.६९ प्रतिशत रहेको बताउँदै बाँकेमा रोग प्रकोप दर ०.२९ प्रतिशत मात्र रहेको बताउनुभयो । यसअघि ४ महिलासहित १२ जनाको मृत्यु भईसकेको समेत बताउनुभयो ।