नेपालगन्ज, ७ मंसिर – आईतबार बाँकेका थप ३१ जना संक्रमित कोरोना मुक्त भइ डिस्चार्ज भई घर फर्किने भएका छन् ।
जिल्ला कोभिड–१९ संकट व्यवस्थापन केन्द्र बाँकेका फोकल पर्सन नरेशबाबु श्रेष्ठका अनुसार कोहलपुर नगरपालिका वडा नम्बर १० का ४ बर्षिय एक बालकसहित बाँकेका १६ महिला र १५ पुरुष गरी ३१ जना संक्रमित कोरोना मुक्त भई घर फर्किंदै छन् । उनीहरुलाई कार्तिक २७ गते कोरोना संक्रमण देखिएपछि विभिन्न आइसोलेसनमा राखिएको थियो ।
यो सँगै बाँकेमा कोरोना संक्रमणबाट मुक्त हुनेको संख्या ३ हजार ५ सय ४ पुगेको छ ।
हाल विभिन्न आइसोलेसन केन्द्रमा १ सय ५४ जना सक्रिय संक्रमित उपचाररत रहेका छन् भने बाँके जिल्लामा हालसम्म कोरोनाबाट संक्रमितको संख्या ३ हजार ६ सय ९६ रहेको छ । बाँके जिल्ला भित्रका ३८ जनाको कोरोना संक्रमणका कारण मृत्यु भईसकेको छ ।