नेपालगन्ज, १३ असोज – जिल्लाका विभिन्न आईसोलेसनमा रहेका १५ महिलासहित ४४ जना निको भई घर फर्किने भएका छन् ।
भाद्र ३० गते कोरोना संक्रमित देखिएका उनीहरु आज मंगलबार डिस्चार्ज भई घर फर्किने भएको स्वास्थ्य कार्यालय, बाँकेका फोकल पर्सन नरेशबाबु श्रेष्ठले बताउनुभयो ।
हालसम्म बाँके जिल्लामा १ हजार ८ सय ६० जना कोरोना संक्रमित देखिएकोमा उपचारपछि १ हजार ५ सय ७ जना डिस्चार्ज भई घर फर्किसकेका छन् भने विभिन्न आईसोलेसनमा ३ सय ४८ जना रहेको फोकलपर्सन श्रेष्ठले बताउनुभयो ।
उहाँले बाँकेमा बिरामी निको हुने प्रतिशत ८१.२ रहेको छ भने बिरामी मृत्यु दर ०.७० प्रतिशत रहेको बताउँदै बाँकेमा रोग प्रकोप दर ०.३१ प्रतिशत मात्र रहेको बताउनुभयो । यसअघि ४ महिलासहित १५ जनाको मृत्यु भईसकेको समेत बताउनुभयो ।