डुडुवा, ८ असोज – १३ औ दक्षिण एसियाली खेलकुद सागमा रजत पदक प्राप्त गर्ने डुडुवा गाउँपालिकाका दुई जना खेलाडी र दुई जना कोचलाई बुधबार नगद पुरस्कारसहित सम्मान गरिएको छ ।
२०७६ मंसिरमा नेपाल सरकार युवा तथा खेलकुद मन्त्रालयद्वारा आयोजित सागमा डुडुुवा गाउँपालिका वडा नंं ५ का शुसिला चन्द र निर्मला घर्तिमगरले रजत पदक प्राप्त गरेको र कोच खेलाडी पदमबहादुर बुढाथोकी र मुम्ताज अलीले खेलको माध्यमले गाउँपालिकाको नाम पहिचान गराएकोमा उहाँहरुलाई सम्मान गरिएको छ ।
गाउँपालिकामा बुधबार एक कार्यक्रमको आयोजना गरि दुबै जना खेलाडीलाई दोसल्लासहित कदर पत्र र नगद रु जनही ५० हजारका दरले सम्मान गरिएको प्रमुख प्रशासकिय अधिकृत प्रशुराम उपाध्यायले बताउनुभयो । चारै जना खेलाडीलाई गाउँपालिका अध्यक्ष नरेन्द्रकुमार चौधरीले नगदसहित सम्मान गर्नुभयो ।
सम्मान गर्दै गाउँपालिका अध्यक्ष चौधरीले खेलकुदको माध्यमबाट राष्ट्रियस्तरमा नै गरिमा बढाएको र डुडुवाको नाम समेत रोशन गरेको भन्दै खेलाडीको थप हौसला तथा उत्प्रेरणा जगाउन सम्मान गरेको बताउनुभयो । उहाँले भन्नुभयो– ‘यो सम्मानले यहाका थप स्थानीय खेलाडीहरुको उत्प्रेरणा बढाउनमा मद्दत गर्दछ ।’
कार्यक्रममा प्रमुख प्रशासकिय अधिकृत प्रशुराम उपाध्याय, शिक्षा तथा खेलकुद शाखा प्रमुख संजयकुमार कर्ण लगायतको सहभागिता रहेको थियो ।