नरैनापुर, ५ असोज – बाँकेको नरैनापुर गाउँपालिकाका नयाँ प्रमुख प्रशासकीय अधिकृतका रुपमा महेन्द्रजङ्ग शाही आएका छन् । आईतवार एक औपचारिक कार्यक्रमको आयोजना गरी गाउँपालिकाले नयाँ प्रमुख प्रशासकीय अधिकृतका रुपमा उनलाई स्वागत गरेको छ ।
गाउँपालिकाका अध्यक्ष इस्तियाक अहमद शाहको अध्यक्षतामा भएको परिचय तथा स्वागत कार्यक्रममा बोल्दै प्रमुख प्रशासकीय अधिकृत शाहीले गाउँपालिकामा अबका दिनमा रोजगारमुलक र उत्पादनमुखी कार्यक्रमलाई प्राथमिकता दिनुपर्ने बताएका छन् ।
स्वागत कार्यक्रममा बोल्दै शाहीले स्थानिय बासिन्दाहरुको सुझाव र आवश्यकताका आधारमा योजनाहरु छनौट र कार्यान्वयन हुनुपर्नैमा जोड दिए । यस अघि रहेका नरैनापुर गाउँपालिकाका प्रमुख प्रशासकीय अधिकृत मणिराम खरालको सरुवा भएपछि आईतबार शाही प्रशासकीय अधिकृतका रुपमा आएका हुन् ।
गाउँपालिकाका अध्यक्ष शाहको अध्यक्षतामा भएको विदाई कार्यक्रममा प्रशासन प्रमुख विजयकुमार यादव र सूचना अधिकारी लक्ष्मीकान्त मिश्रले कुशल प्रशासक र अनुभवी नेतृत्वमा काम गर्ने अवसर सृजना भएको बताएका थिए ।
जिन्सी शाखा प्रमुख भरत महतोले सहजीकरण गरेको परिचय तथा स्वागत कार्यक्रममा वडा नम्बर १ का अध्यक्ष मोल्हे बेहना शेष, २ का अध्यक्ष मसुदअहमद शाह, ४ का अध्यक्ष दिनेशप्रसाद शर्मा लगायत अन्य जनप्रतिनिधि, कर्मचारीको उपस्थिति रहेको थियो ।
परिचयात्मक कार्यक्रम समापन लगत्तै आईतवार नै प्रमुख प्रशाशकीय अधिकृत शाहीले ६ वटै वडा र वडा कार्यालयहरुको अवलोकन गरेका छन् । वडा अध्यक्ष र वडा सचिवहरुसँग भेटघाट गरी आगामी दिनमा सेवाग्राही मैत्री कार्यालय बनाउन र प्रभावकारी उपलब्धीका लागि के कस्ता रणनिति अवलम्बन गर्ने बारे सुझाव समेत माागेका छन् ।