नेपालगन्ज, २६ पौष – नेपालगन्ज उपमहानगरपालिकाका प्रमुख डा. धवलशम्शेर राणाले नगरलाई सबै क्षेत्रमा विकास गर्न कर्मचारी र जनप्रतिनिधीबीच साथ र सहकार्य हुनुपर्नेमा जोड दिनुभएको छ ।
जनप्रतिनिधी सिमित अवधीको लागि हुने भन्दै उहाँले कर्मचारीले स्थायी सरकारको रुपमा महत्वपूर्ण भूमिका निर्वाह गर्न सक्ने बताउनुभयो । कर्मचारीहरुका लागि ३ दिने सकारात्मक सोच तथा व्यवस्थापन सम्बन्धि तालिमको आइतबार समापन गर्दै नगर प्रमुख राणाले तालिममा सिकेका सीपलाई कार्यक्षेत्रमा कार्यान्वयन गर्न सुझाव दिनुभयो ।
उपप्रमुख उमा थापामगरले जनताप्रतिको दायित्व महत्वपूर्ण भएको भन्दै सबैजना सकारात्मक भएमा धेरै काम गर्न सकिने बिश्वास ब्यक्त गर्नुभयो । उहाँले सहज सेवा प्रवाहमा यसखालका तालिमले सहयोग पुग्ने बताउनुभयो ।
तालिमका सहभागी तथ्यांक अधिकृत सुरेन्द्र पन्त, वडा सचिव उपमन्यू त्रिपाठी र गौरीकुमारी शाहीले तालिम निकै प्रभावकारी भएको भन्दै सिकेका ज्ञानलाई कार्यान्वयन गर्ने बताउनुभयो ।
जिआईजेडको सहयोगमा भएको तालिमको समापन कार्यक्रमको सञ्चालन प्रशासन प्रमुख राजन केसीले गर्नुभएको थियो ।
